బిస్మిల్లా ఖాన్ జాతి ఆత్మ

భగవద్గీత చదవలేదు
ఖురాను కంఠస్తం చెయ్యలేదు
కానీ అతనొక మహా శివరాత్రి
కాశీ విశ్వేశ్వరాలయంపైన నెలవంకను తగిలించాడు

మానస సరోవరాల ఘనీభవనంతెలియదు
మనుషులు శిలలుగా మారే వైనం కూడా తెలీదు
కాని అతను శిలలను ద్రవీకరించె అద్భుత ప్రక్రియ కనుగొన్నాడు

గాత్రంతొ గారడీలు చెయ్యలేదు
స్తోత్రపారాయణాలూ చెయ్యలేదు
కానీ అతను
మనుషుల పందిరిమీద
సప్తసువాసనల లతనెదో పాకించాడు

నదీ స్నానాలు చెయ్యలేదు
కొండలు గుట్టలు ఎక్కలెదు
కాని అతను
గంగాబాలను తన ముంగాళ్ళమీద
సురస్వరాల ఉయ్యాలలూగించాడు

ఏకాంత మానవద్వీపాలు చూడలేదు
విచ్ఛిన్న శకలాల గూర్చి వినలెదు
కాని అతను
ఒకేసారి అరవై మందిని
ఉమ్మడి గా వాటెసుకున్నాడు

మహా దార్శనికుడేమీకాడు
ప్రవక్త అంతకన్నా కాడు
కానీ అతను
గుండెనిలువునా తెరిచి
తన జాతి ఆత్మను ప్రపంచానికి ప్రదర్శించాడు
అతను బిస్మిల్లా ఖాన్

Courtesy - ప్రజా సాహితి ,డిశంబర్ 2006